Policia ka dhënë detaje rreth aksidentit ku ishte e përfshirë Ministrja e Industrisë, Rozeta Hajdari, të dielën në rrugën “Vicianum” të Prishtinës, por nuk përmend të jetë intervistuar.

“Rasti në procedurë hetimore”, është përshkrimi që i mungon raportimit të policisë për aksidentin ku u përfshi Hajdari, i zakonshëm në aksidente të kësaj natyre, sikur që nuk përmendet as prokurori të ketë marrë në pyetje Ministren.

Në raportin 24 orësh, policia i referohet Hajdarit si “e dyshuara femër kosovare” e cila përderisa ishte duke drejtuar veturën, ka goditur viktimën mashkull kosovar.

“Viktima ka pranuar tretman mjekësor”, thuhet tutje në raport.

“Rr. Vicianum, Prishtinë (NN) 10.04.2022 – 12:25. E dyshuara femër kosovare përderisa ishte duke drejtuar veturën, godet viktimën mashkull kosovar. Viktima ka pranuar tretman mjekësor”, thuhet në raportin e PK-së.

Ndërkohë, mbrëmjen e së dielës, Hajdari ka dalë me një deklaratë në llogarinë e saj në Facebook, duke thënë se përderisa ishte duke vozitur, dy fëmijë ishin shfaqur papritur në rrugë, duke shtuar se njëri prej tyre ishte përplasur me veturën e saj./arbesh.info/